ادري بـــيك امـــتـيّـه وغـــلطان اجـــيت
وجـــدمك بـــصدفة على دروبـــي گصد
لـــكن آنـــي مـــسودن وبـــيّــــه ابتليت
واليـــطـــب أبراســـي مــا يـــطلع بعـــد
تريد اعوفك وآنــــي كل عمري حصار!
وإنــــتَ حتى هـــدومـــك تـــنگط شــهد
رغـــم كـــل الحـــذر يـــنــصاد الغـــزال
شلـــون لو بجـــدامه طــب حلك الأسد!
وگلـّي يا مـــنجل إجـــه وبــعيونه شاف
لسّـــنابل گـــذلة شگـــرة ومـــا حـصد؟
ويا صـــگر ضم مـــخاليبه وهـــوا چان
بغـــرفة وحــدة و ويّـه طاووس انفرد؟
آنـــي جـــدّيـــت و وجـــدتك بـــعد حين
تريد اچـــذب الگال ((مــن جـــد وجد
))
ادري وجـــهك ابـــد مـــا شايل عـــيون
وجـــهك بـــكل صــــفحة شايلـّـــه بلـــد
وادري بيهـــن سحـــر ما يـــبطل لحين
نـــقـــره مـــيّـة ((قـل هـــو الله احد))؟
وحـــاجبـــيـــنك لــــو تلاگـــن ثائـــرات
الگـــــمر عـــن الأرض خـــوف ابتـــعد
ولـــو نـــزل رمـــشك تجي وياه النجوم
والجّـــبـــال ويــاه تصـــعد لـــو صـــعد
لكـــن آنـــي آخـــر نـــسل لاهــل الكلام
آنـــي في رســـم الحـرف وحـده اجتهد
آنـــي شاعـــر كسر خـــشم المــستحيل
ينفـــتح گـــدامــي كـــل بـــاب إنإصـــد
إنحـــنـــت لاقلامـــي حـــدباء العـــراق
وأبـــو الهــول بمـــصر لفكاري ســـجد
الـــوِرد عن ســندبادك..حچيـــي چـــان
عجــــــــــل لو تسمع كلامي الما ورد!!
اصغـــر جــيوشي.....ورود الياسمـــين
واضعـــف جنودي.....گـلب صان العهد
لو زعـــلت أگـلب الدنيا.....ولو رضيت
أنــفض تـــراب العـــلى آشـــور وأكـــد
وإنـتَ واحد..وادري حسنك يرمي جيش
و آني شعـري جيـــوش وإلهامي مـــدد
والفـــرد مـــهما أصـــر واصبح شـجاع
يـــنهـــزم بـالتّــالي لـــو گـــابــل عـــدد
ولا تلـــومـن جُـرئتي مـن احچي معاك!
مـــثلك بـــهذا الزّمـــن صعـــب العــثور
إحـــنه ضفـــتين وجـــسر يربـطنه كون
ضفتي جـــوع وضفـّــــتك لـذّة وسرور
مـــو جسر واحـــد جسورن راح اكون
حتى يـــسهل بـــين ضـــفتينه العـــبور
لان اذكـــر شـــطر مـــن حــكمة يقـول
((فـاز باللــذّاتِ مـــن كـانَ جـــســور))
تحياتي
رسول الدليمي
السبت مارس 14, 2009 12:18 pm