صـــــــدك بعـــــد متحبنـــــي؟

صدك بعد متحبني؟

صدك تقبل حبيبي لغيري هسه تصير
وصدك مليت مني وبعد متحبني
صدك هانت عليك سنينه الحلوات
وماهانت عليك شلون تتركني
من يمته المذاهب نحسبلها احساب
ومن يمته الطوائف جانت تهمني
انه لمن عشكتك ماسألت الناس
ولاجنت ادري اصلك شيعي لو سني
شجاك تغيرت وبكلبك انته شصار
جنت تموت بيه وجنت تحبني
وجنت اتنفسك وانته الهوه بدنياي
وجنت لو تبتعد لحظات .... تخنكني
معقوله الورد ينكر جميل الماي
وانته بها السهوله تنازلت عني
ماانكر مقصر اجت فتره وياك
لكن موبديه الوكت يجبرني
شفت يمك نفط وابين اديك الماي
وانه بناري اشتعل ردتك تخلصني
لكيتك بالعكس مايك شمرته ابعيد
وجبت النفط بيدك حته تحركني
شسولفلك بعد؟ طعم السوالف راح
ردت منك توافي وخيبت ظني
ادري الوكت هو الخله كلبك هيج
وادري الطائفيه الباكتك مني
وقبل لاتبتعد عندي سؤال ارجوك
فكر ويه روحك وعود جاوبني:
باجر لو متت وتشوفني بتابوت
هم تبجي عليه وبعد تذكرني؟